ગીત !

તારો  પગરવ  સંભળાય  છે  પ્હોરમાં ,
       વાસંતી  વાયરો  વાયે છે  જોરમાં !

આજ મારું  અંતર  પણ  જોરથી  ગાજે ,
        મળશે  કદાચ તું  વરણાગી સાંજે !
હું   તો     ભમતી   રહીશ મારા તોરમાં,
        વાસંતી  વાયરો  વાયેછે જોરમાં !

ધરતી   ને આભ -  ભીંસ   દઈ  દબાવે,
        તારી તે યાદ મને ,  ત્યારે  સતાવે.
શાન -ભાન  ભૂલાય પંખીઓના શોરમાં,
       વાસંતી  વાયરો  વાયે  છે જોરમાં !

સરવરની   પાળે ,  લહેરખી  હવા ની,
       માધવના પ્રેમમાં  મીરાં  દીવાની.
ટહુકા સમાયા  છે   કળાયેલ    મોરમાં,
        વાસંતી  વાયરો  વાયે છે જોરમાં !

ભમરોયે  ભાન  ભૂલી  ગુંજારવ કરતો,
        બાગમાં  ફૂલની ડાળેડાળ  ફરતો
બાગબાન  બોલે   છે   આજ    તોરમાં.
        વાસંતી  વાયરો વાયે  છે જોરમાં !

આવડા  હૈયાની  માંડી   છે  મેં   વાત,
        લાગણીઓ  થઈ આજે રળિયાત.
'કાન્ત ' નું ગીત દોડે કમખાની કોરમાં,
         વાસંતી વાયરો  વાયે છે જોરમાં !
                          ***
-કૃષ્ણકાંત ભાટિયા 'કાન્ત '



.