ગઝલ 

અભ  પણ  ખિલેતો  અજ  ડિયારી  આય !
હુભ  સેં  મિલેતો  ઈ, અજ  ડિયારી  આય !

ફટાકડા  ફૂટેંતા ધનાધન ,હિત  ધિલ  ભરે,
કચ્છી  માડુ  નચેતો ,અજ  ડિયારી  આય !

અંગણ મેં  ડિયા  ઝગમગૅ  મિઠી  હુભ  જા,
ચંધર  પણ  કુછેતો , અજ  ડિયારી  આય !

જુવારિયોં  હિન ટાણેં  કે ,ટાણેં  જો મહિમા,
અંધારો  સટ  કઢેતો,  અજ ડિયારી  આય !

ગોરે  વિજોં   સુખ  સપનાં ,નબરે  તેં  પાં ,
રમાપતિ  અચેતો ,અજ    ડિયારી  આય !

ખીરમેં   જિજી  ખન , મ   વિજજા   ભલા ,
મિઠો  સ્વાદ રસેતો, અજ  ડિયારી  આય !

રોપિયોં   સદભાવના કે ,પાં  ભેગા  મિલે,
'કાન્ત ' અરજ કરેતો,અજ  ડિયારી આય !
                         ***
-કૃષ્ણકાંત ભાટિયા 'કાન્ત '