ગીત 

વાસંતી  મોસમમાં   કેસૂડો  ખીલ્યો  ને ,
                 વગડામાં  ઊગ્યા છે  બોલ  !
મોલ  મોલાતો  તજી પ્રીતમજી આવ્યા,
                  હૈયામાં    ઉભરાયા   કોલ !
                                          oવાસંતી 
વચમાં ઊભો ,ઓલો રંગ રંગ  કાચિંડો ,
                  ધસમસતા   શ્વાસને  પૂરી,
નજરુંને  લઈ જાય ,ઓચિંતી  દૂર દૂર,
                 રહી  જાય  તોયે  એક દૂરી !
ઊંચે   આકાશમાં    દોડે છે વાદળાં ને ,
                 કૂવે  ધૂબાકા મારે  છે ડોલ !
                                         oવાસંતી 
ફાટફાટ   થાય રંગરસિયા  નું યૌવન ,
                 પિચકારી  રંગ  ભરી ઝૂમે,
ધસમસતી પેલી   નદિયુંના  તટ પર,
                વાયરો  ગોરીના હોઠ ચૂમે !
લહેરાય ઓઢણી ,ભાતીગળ  ભાતમાં,
                 દઈ  દે એ  ઝટપટ  ખોલ !
                                       oવાસંતી 
ઢોલીના   ઢોલે   નાચે સૌ મસ્ત થઈ,
               સમય  થયો  છે વરણાગી ,
શાન     ભાન     સઘળુંયે    ભૂલી  ને,
             ચેતના ગઈ  છે આજ જાગી !
ઝટપટ  દોડે  પામવાને    ક્ષિતિજ ને,
            સૂરજની  ખૂલી    જાય પોલ !
                                      oવાસંતી 
                         ***
-કૃષ્ણકાંત ભાટિયા 'કાન્ત '