હે રામ !

બાપુ......સત્તાની ગલીઓમાં આ
બધાં ખુરશી પર બેસવા નીકળ્યા છે !
હવે એ ચાલશે રેડ કાર્પેટ પર.........
રહેશે બંગલામાં.......ઘૂમશે મોંઘી ગાડીઓમાં !
'સબકા સાથ સબકા વિકાસ'......'આમ આદમીના'
નામે 'ખાસ સગવડો ભોગવશે ' !
પોતે જનતા સાથે કરેલા વાયદાઓ પૂરા નહીં
કરી શકે ત્યારે દોષનો ટોપલો બીજાના માથે
મૂકી દેશે !
અને અમે નીકળી પડ્યા છીએ
એમની વાહ વાહ કરવા માટે.......!
અમારો વર્ષોનો અનુભવ છે કે નેતાઓએ
રચેલા મીના બજારમાં અમને નથી સુખ
મળતું કે નથી અમારું દુઃખ વેચાતું !
છતાં એમના જયજયકાર માટે આ
દેશની સડકો પર અમે કીડીયારાની જેમ
ઉભરાઈએ છીએ.......અને ફરી પાછા
હતા ત્યાં ને ત્યાં વસીએ છીએ
શ્વસીએ છીએ !
બાપુ ....આજે તમે પણ એમના માટે
અપ્રસ્તુત છો !તમે માત્ર ખુરસી સુધી
જવાનો રસ્તો છો !નેતા કોઈ પણ હોય
ફિતરત બધાની સરખી છે.
આ દેશના 40 %લોકોને બે ટાઈમ જમવાનું
નસીબ થતું નથી ત્યારે 'કમળ 'લાખોનો
સૂટ પહેરતાં અચકાતો નથી ......'ઝાડુ'
ફાઈવ સ્ટાર હોટલમાં 'કેક' કાપતાં
શરમાતો નથી !
એ તો તમે હતા કે આ દેશની નારીને
એક કપડાં માં જોઈને દ્રવી ઊઠ્યા અને
આજીવન સીવેલા કપડાં ન પહેરવાનું
વ્રત લીધું !
આમ આદમીની વાતો કરનારા આ ખાસ
આદમીઓ પોતાની શપથ  વિધિ પાછળ
પણ કરોડો રૂપિયાનો ધુમાડો કરતાં
નહીં અચકાય !જરાય નહીં શરમાય
એ પાંચ વરસ સત્તાના મદમાં રહેશે
અમે......પ્રકાશ......પાણી......વાણી
ની પાછળ દોડતા રહીશું !
પાંચ વરસ પછી ફરી એ અથવા બીજો
કોઈક 'આમ આદમી 'બનીને આવશે.....
અમને ભરમાશે......!
અમે એની જયજયકાર કરશું......
આ ચાલતું રહેશે.........છળતું રહેશે.......!
                    ***
-'કાન્ત'