ગરબો !

આવ્યાં રૂડાં મા ના નોરતાં રે,

         .....પૂરાં થાશે રમવાના ઓરતાં રે !

ચાચર ચોકમાં માડી પધારશે,

      .....ઊંચા આસને આઈ બિરાજશે !

હૈયાના  સાદ હવે ખૂલતાં  રે,

        .....પૂરાં થાશે રમવાના ઓરતાં રે !

મંદ મંદ લહેરખી વાયુનો વીંઝણો ,

       .....મન પણ થયો છે આજે સમજણો !

દલડાના તાર હવે બોલતાં રે,

     .....પૂરાં થાશે રમવાના ઓરતાં રે !

આંખે આંજું હું ગરબાની જ્યોતને,

       .....કોરે મૂકી દઉં   સંસારી  પોતને !

ગરવના  ભાર અહીં ડોલતાં રે,

      .....પૂરાં થાશે  રમવાના ઓરતાં રે !

ઊંચે છે આભ ને નીચે જલથલ છે,

          .....ભીતરે મારા  આ કેવી  હલચલ છે !

કંકુ ને ચોખા મા ને ભાલે સોહતાં રે,

      .....પૂરાં થાશે રમવાના ઓરતાં  રે !

----------------------------------------  

-કૃષ્ણકાંત ભાટિયા 'કાન્ત'

=======================