નંદનવન !

નૂતનતાનું  નંદનવન   રચાયું   મારા આંગણે,
પ્રકાશપુંજ  પરમેશ્વરનું   સમાયું મારા આંગણે !

વેદમંત્રનો   નાદ   સરગમ    થઈને    ટહુક્યો,
નવલી  ઊષાનું  પ્રાગટ્ય  કરાયું મારા આંગણે !

હૈયાના   ધબકારા  રક્તવાહિનીઓમાં  વહેતા,
સોહાગણનો  સૌભાગ્ય    ભરાયું  મારા આંગણે !

ફૂલ-ફૂલની  ફોરમ   લઈને  ઊડે  મનના ગોટા,
પારિજાતનું  અમૃત ફળ, વવાયું મારા આંગણે !

પ્રાણ  તણી  વીણાના  તાર;  કરે  મધુર  ઝંકાર,
રાગ  કલ્યાણનું  સપ્તક,ગવાયું  મારા આંગણે !

અંતરપટ ;  કબીરાની    સાખીમાં   ખુલું -ખુલું ,
પ્રભાતનાં પુષ્પોનું ભાથું, લવાયું મારા આંગણે !

શોધ્યો ;  અહીં -તહીં ,  મંદિર-મસ્જિદ-ગરુદ્વારે,
થાકી-પાકીને  'કાન્ત'    અવાયું મારા  આંગણે !
                             ***
-'કાન્ત'