કેમ  છે  ?

આજે સવારે  મારા ઘરની  બાલ્કનીમાં 
બેઠેલી  દેવચકલીએ  મને  'happy birthday'
કહી પૂછ્યું  કેમ  છે ?
મેં કહ્યું ,અહીં  બધું  હેમ-ખેમ છે !
વહેતા  દાયકામાં  મૂકી છે  મેં 
છલકાતી-મલકાતી  જિંદગી .
સૂર  ને શબ્દની  મહેફિલ  સજાવું 
બની રહે  એ જ મારી બંદગી !
નથી  ભીનાશ  થઈ  ઓછી,
નથી  થયું  ભીતર ખાલી.
તાળું  વાસ્યું  નથી કોઈ દિ ,ખજાનાને 
લૂંટી જાય કોઈ તો દઈ દઉં  તાલી !
67 વરસેય  ઘડપણ  નથી  આવ્યું ઓરું  ,
તાજગી-ઉમંગ  મારી સાથે દોડે !
આજેય લાગે કે બેઠો છું  હું બાળપણને ખોળે !
જીવતર ને  જીવું  છું  હું  પળે પળ  મોજથી,
ને  અવરની  ખુશીઓમાં  રાજી !
હિસાબ તપાસું   હું મારી  જિંદગીના ,
બનતો નથી દુનિયાનો કાજી !
સૂરજ  તો  ઊગે  ને આથમીયે જાય,
મારે  તો  ભાઈ, બધું  એમનું-એમ છે !
મેં કહ્યું અહીં બધું હેમખેમ છે !
                         ***
-કૃષ્ણકાંત ભાટિયા 'કાન્ત '