એક  દિ '      

એક  દિ ' હરિને  મેં  પૂછયું ,
પ્રભુ  ! હું  શું  કરું  તમારા  માટે ?
રોજ  તમે  સુણો ,ને હું બોલું,
તમારા સન્મુખ પણ  હું ખોટો ડોલું.
આજે  તમે  માગો  ને હું  આપું,
અડધું  પડધું  માંગતા  નહીં,
માગજો  હરિ  આખું.

તમે ભલે કરુણાના સાગર છો ,
ક્યારેક  હું યે  એને આપી  દઉં  ખો.
ભંડાર તો મારાયે  ભરપૂર છે,
પણ માંહ્યલો  માત્ર  વચનોનો શૂર છે.
આજે તો ચાલવું છે મારે તમારી વાટે ,
પ્રભુ ! હું  શું  કરું તમારા માટે ?

 રૂડાં  અજવાળાં  છે તમારા દેશમાં,
હું  ભટકું  અંધારાના  વેશમાં.
કાંખમાં મેલું  બનાવટને ,
અને પછી વખાણું  આ  ફાવટને !
વેચાઈ જવું છે  આજે  તમારી હાટે ,
પ્રભુ ! હું શું કરું તમારા માટે ?

હરિ  મંદ  મંદ  હસ્યા ,મારી તરફ ખસ્યા,
કહ્યું ,'વત્સ  તારે આપવું  હોય તો ,
તારો  વિષાદ  મને આપી દે.
તારી સઘળી ભ્રમણાઓ  મારા ચરણોમાં નાખી દે ,
પછી તારે ભટકવું નહીં પડે ઘાટે  ઘાટે ,
હું તને મળીશ કોઈક રાંકની  ઝુંપડીની વાટે !
                             ***
-કૃષ્ણકાંત ભાટિયા 'કાન્ત '