તડકો !

ઊંચેરા  આભમાંથી    ડોકાય તડકો,
ડામરની  સડકો પર, શેકાય  તડકો.

આઘે લગી  ,તરુવરનું  નામ   નહીં,
આવા તાપમાં  કોઇનુંયે  કામ  નહીં.

કહો કોને  ત્યાં  હવે,  રોકાય  તડકો ?
ડામરની  સડકો  પર, શેકાય  તડકો.

વગડો જટાજૂટ , કેવો  ભેંકાર ભાસે,
તરસ્યાને શીતળ  જળ ,કોણ પાશે ?

ગુલમ્હોરનાં બારણે,પોંખાય તડકો.
ડામરની  સડકો પર, શેકાય તડકો.

આકળવિકળ થાય ,સૃષ્ટિ બિચારી,
વાત  એક  લીધી  મેં  યે   વિચારી.

ફાટું -ફાટું  થાય , ને ફેંકાય   તડકો,
ડામરની  સડકો  પર શેકાય તડકો.
                      ***
-કૃષ્ણકાંત ભાટિયા 'કાન્ત '