ગરમાળો  !

ધોમધખતા  તાપમાં ઊભો ,હું છું  ભઈ  ગરમાળો,
તમે  કદીયે  મને   આકુળ-વ્યાકુળ  નહીં    ભાળો  !

સોનાવરણી  સીમ  બની  છે,   કેસૂડો  એ  ખીલ્યો ,
વાસંતીનો  અક્કેક  બોલ,તરુવરોએ  પણ ઝીલ્યો !
અંતરના ભીડેલાં દ્વારોનો ,ખુલી જશે  ભઈ  તાળો !
                                                               0હું  છું 
મોસમ  છે આ  રંગવાની  ખૂબ  કરો  તમે  મસ્તી,
ભૂલી  જાઓ   સુધબુધ ,ભૂલી જાઓ  તમે   હસ્તી !
તવ  સંગે  નાચશે  ગાશે ,ઝૂમી  ઊઠશે  આ ડાળો  !
                                                               0હું  છું 
ઊતર્યાં  છે  આ ધરતી ઉપર ,રંગો મેઘ ધનુષના ,
પિચકારી ભરવી  છે એને, ખેલ જોવા  મનુષ્યના ! 
લાલચટકનો છું હું પ્યાસી,રંગ જોઈએ નહીં કાળો !
                                                               0હું છું 
દન  આખો  કલબલ કલબલ ,સૌ કોઈ છે ઘાયલ,
ક્યાંક  વાગતી  ફાગણિયાની, રૂમઝૂમ     પાયલ !
ટમકે  આકાશે  તારલિયાં  ,   નથી  ચંદ્રને  વાળો !
                                                               0હું છું 
ફાગ  ગવાય  હોળીના ,ફળિયે  છે    ધીંગામસ્તી,
વરણાગી  લાગે   છે   આજે  ચારે   બાજુ  વસતિ  !
ભાગી   જાય  દોટ   મૂકીને  મનનો બધો  કંટાળો !
                                                               0હું છું 
                             ***
-કૃષ્ણકાંત ભાટિયા 'કાન્ત '