ગીત  !

અષાઢી  વાદળ  વરસે  નહીં,
           સખી  મારે  શું  કરવું ?
આકાશે  વીજ   ચમકે   નહીં,
          સખી  મારે  શું   કરવું ?

તોફાની  વાયરો  થયો  વેરી,
          લીંપી ઘૂંપી  મેં  શેરી.
મેઘ   ઓલો    મલકે   નહીં,
         સખી  મારે  શું   કરવું ?
                          0અષાઢી.....
સરોવરનાં   પાણી   સૂકાયાં ,
         વરુણદેવ કયાં રોકાયા ?
ગાગર   મારી  છલકે   નહીં ,
         સખી   મારે  શું  કરવું ?
                          0અષાઢી....
બીજું  બધું ઠીક  હૈયે છે બીક,
          હવે કેમ ઝીલશું ઝીક ?
ઓણસાલ  એ   પરસે  નહીં,
           સખી મારે  શું  કરવું ?

સૂનું છે પનઘટ,સૂની છે કેડી,
          હિજરાય ઘરની મેડી.
'કાન્ત ' ગીત  લખશે   નહીં,
          સખી મારે  શું  કરવું ?
                  ***
-કૃષ્ણકાંત ભાટિયા 'કાન્ત '