જો તો ખરો !

સૂતરના  તાંતણાંની  માલીપા ,જો તો ખરો,
સ્નેહ બંધનના  કેટલાં  તંતુઓ  સંચરે !
બ્હેનીના કંઠે ગવાયેલાં  ગીતોને  રાખજે 
તારાં  ભીના-ભીના અંતરે !

કાંડે  તે બાંધી  રક્ષાની રાખડી  ને ,
મોઢામાં  મૂકી  છે સાકર 
ભગિનીના  પ્રેમ આગળ ગદગદ થઈ 
જાય મારો ઠાકર
બાંધીને રુદિયાને રક્ષાબંધનથી ,જો તો ખરો 
કેવા ભાગે રિપુઓ રક્ષાના  મંતરે  !
                                       0બ્હેનીના...
અજવાળે ઓઢે બ્હેની ,ભાઈ તારાં ઓરતાં ,
ને  એનું ફળિયું  રાત આખી જાગે 
ક્ષેમકુશળ તારા  વિધાતા પાસે 
લડી લડી ને એ માંગે 
આંગણીયું  ઓગાળીને ,જો તો ખરો 
કેવી ચાંદની બિછાવી છે કુદરતના તંતરે !
                                        0બ્હેનીના...
કલબલતી  થાય જયાં  પૂનમની શ્રાવણી સવાર,
આજ મારા ભઈલાના ઘેર જઈશ 
ભાઈના કાંડામાં  બાંધીશ હું રક્ષા,
બસ બ્હેનીની ની એક જ તવાર !
ખમ્મા મારા વીરને  ખોલીને ,જો તો ખરો 
સંભળાશે આ શબ્દો,તને 'કાન્ત 'ના જંતરે !
                                         0બ્હેનીના...
                        ***
-કૃષ્ણકાંત ભાટિયા 'કાન્ત '