હરિ  લીલા  !

માસી  પૂતના ને સંગે મામે કંસ  કે  મારે  વિધેં,
સેંકડા  સંહારે    વિધેં     નાથ    હોશિયારી   સેં.

સારથી    ભનીને   વ્હાલે   કૌરવેં  જી  કઢેં  જડ,
દ્રૌપદી જી  લજ  ઢકેં ,ચીર  પૂરેં  સમજધારી સેં.

કુબજાકે  ઉભી   રખી , અપ્સરા    ભનાય  ડિને 
શબરી  જા એઠા  બેર ,રામ ખાધેં  બલિહારી સેં.

કાલી નાગ    નાથે  કરે ,  જમના  કે    કોરી  કેં ,
સુદામા  જા  પગ    ધૂતેં ,   વેંજારેં  હિંયારી  સેં.

રાસલીલા  રચાય કરે, ગોપીયેં  જો  માન રખેં ,
રાંધ  ઘણે   ખટી  વ્યો ,નટવર   ઈચીયારી  સેં 

ઉમાસ  કે  અંધારો  ડિનેં ,રાહુ મથો વઢે  વિધેં 
દેવતાએં કે  અમરત  પિરાંય ,પ્રેમ પિયારી સેં

'કાન્ત 'ચે  સચી ગાલ ,હરિ  મુંજો  માલામાલ,
રંગ સેં    ભરે ડિનેં ,કવિ કે મારેં  પિચકારી  સેં.
                               ***
-કૃષ્ણકાંત ભાટિયા 'કાન્ત '



.