ગીત 

તમે   એકવાર  આવોને   શ્યામ ,
અહીં    ખોવાયું  ગોકુળિયું  ગામ.

ફૂલને  પૂછું , હું    ભમરાને   પૂછું,
આંખો  ચૂવે   તો ,પાલવથી લૂછું.
કઈ   કેડીએ   અટક્યા ઘનશ્યામ ?
                                        0તમે...
યમુના છે કાળી,કાળા વનમાળી,
રાસ રમતા ,મને દેતા'તા તાળી.
પ્રભુ    ખેટૂં  કરો   છો   કાં   આમ ?
                                       0તમે...
દાણ ન માગે ,ન માખણ  લૂંટાવે,
વનરા તે વનમાં ,ન કોઈ સતાવે.
ગોરસ-મટુકીના   વધ્યા     દામ.
                                       0તમે...
મોરલી સૂની -પનઘટ  છે  સૂના ,
આપણા સંબંધો ,વર્ષોથી   જુના. 
રહે    કયાંથી   કનૈયા   હવે હામ.
                                    0 તમે...
ઝંખું શૂન્ય થૈ,સુધબુધ બધી ગઈ,
રાધાની વેદના,મૂંગી મસ્સ  થઈ 
મારે    પીવાં    છે    પ્રેમના જામ.
                                     0તમે...
ચાંદો સળગ્યો,સૂરજ સળગ્યો છે,
કયો   મારગ ,તમને વળગ્યો છે ?
કહો   'કાન્ત 'ને ,  રહેવું ક્યે ઠામ ?
                                     0તમે...
                     ***
-કૃષ્ણકાંત ભાટિયા 'કાન્ત '