કનૈયા !
ચાલ, માખણને મિશ્રી ખાવા આવી જા કનૈયા !
જશોદામાના લાલા યમુના તટના બંસી બજૈયા !
પારણું ઝૂલાવશું ને તને રૂડા મોતીડે વધાવશું ,
નંદ ઘેર આનંદ ભયો ની જયજયકાર બોલાવશું !
ચાલ,તારી લીલા છોડી,દિલમાં સમાઈ જા કનૈયા !
મટકી ફોડ ઉત્સવમાં મોજથી છવાઈ જા કનૈયા !
મધ ચટાવશું ને મેશનું કાળું ટીલું પણ લગાડશું ,
હોંશે હોંશે ગાતાં ગાતાં મીઠા હાલરડાં સંભળાવશું !
ચાલ,આરતીના સૂર-નાદમાં ગવાઈ જા કનૈયા !
ભક્તોની ભીડમાં લાલ બની સમાઈ જા કનૈયા !
નાચશું મસ્ત થઈ નોબત ને ઢોલ અમે વગાડશું ,
કૃષ્ણ તને બાળ ભાવે ભજી ને અમે તો રમાડશું !
ચાલ, નેહ નીતરતી આંખોમાં અંજાઈ જા કનૈયા!
'કાન્ત'ના આ મધુર ગીતમાં છલકાઈ જા કનૈયા !
***
-'કાન્ત'
No comments:
Post a Comment