ગીત 

સાંભળી લે આ ગીત,
સખીરી,મારે કરવી છે હવે પ્રીત.

બિંબ ને પ્રતિબિંબ એક સરખા લાગે,
હાથ છોડાવીને એ દૂર-દૂર ભાગે !
ઠંડા-ઠંડા વાયરાની પજવે છે શીત ,
સખીરી,મારે કરવી છે હવે પ્રીત !

પાંપણના કાંઠે મહેરામણ ઉભરાય,
હૈયું ન રહે હાથમાં, જો ને; એ શરમાય ! 
શીખવી છે મારે સાસરિયાની રીત,
સખીરી ,મારે કરવી છે હવે પ્રીત !

કમખાની દોર  પીઠ પર પાડે સળ,
મારા અંગ ઉપાંગમાં ભાળે એ વળ !
થતી રહે સાહ્યબા સાથે હાર ને જીત !
સખીરી,મારે કરવી છે હવે પ્રીત !

આશ્લેષમાં એવી તો સમાઉં,
ચાર હોઠો પર હું જ હવે ગવાઉં !
ઊભી રાખી છે તોયે મેં લજ્જાની ભીંત !
સખીરી,મારે કરવી છે હવે પ્રીત ! 
                    ***
-'કાન્ત'