હા  હું  સમય  છું   !

અફાટ રણની  રેતી  પર  મારાં 
     પગલાંની છાપ  સ્પષ્ટ  દેખાય  છે 
હા , હું  સમય  છું ....
      એક એક  ક્ષણ  ગાઢ  નિંદ્રામાં  
સૂતી   છે  અહીં .
       મહાભારત  હો કે હો રામાયણ 
સઘળું  સમાયું  છે મારામાં.
        ભીષ્મ-અર્જુન-વાસુદેવ -દ્રોણ 
આજે પણ  શ્વસે છે,વસે છે-હસે  છે 
        મને  પકડવા માટે  દોટ  મૂકતા 
મૂર્ખ   માણસોને    જોઈને !
        હું કોઈનો થયો નથી-થવાનો નથી 
થઈ  શકું એમ પણ નથી.......
       સત્ય-દ્વાપર -યુગો પર પણ .
મારો  પ્રભાવ  હતો ..
      આજે પણ તું મારો પ્રભાવ જોઈ શકે છે.
       મેં  હમેશાં  તને  સમજાવવાના 
પ્રયત્નો  ખરા દિલથી કર્યા છે !1!
       પણ તારામાં તો વસે છે 
રાવણ-કંસ -દુર્યોધન -આંધળો  ધૃતરાષ્ટ્ર !
        આ 'કોરોના યુગ' પણ  હું જ  છું 
તું ભલેને  ગમે એટલો મોટો  હો,
         આજે તને  મારી આગળ  લાચાર
ઊભેલો  જોઈ  હું ખડખડાટ હસું છું,
         દોસ્ત  આ તો  ટ્રેલર છે ,ફિલ્મ 
હજુ બાકી છે ! જોવી છે ? જોઈ શકીશ ?
         ના.......તો પછી  માણસ બની જા 
હાંકી કાઢ તારામાં બેઠેલા આસુરી તત્વોને 
        હજુ મોડું નથી થયું -કંઈ  નથી ગયું 
સમજી જા  નહીંતર  હું પણ....
        નહીં રોકી શકું તારા વિનાશને !
બધું અહીં જ રહી  જશે,તું અભિશાપ 
       બની જઈશ  આવનારી પેઢી માટે !
મારા નસીબમાં તો  મહાભારત હો 
        કે   મહામારી- જોવાનું લખાયું જ છે 
પણ હું તને  માણસ  તરીકે જીવતો 
       જોવા માગું  છું -કારણ કે 
'હું સમય છું.....!
                            ***
-કૃષ્ણકાંત ભાટિયા 'કાન્ત '