----------- ગીત 

અહીં  કોણ કોની ખબર પૂછે,
સૌ પોતાનાં  આંસુ પોતે લૂંછે !

.....મને થાય એવું તમનેય થાય,
.....લાવ કવિતામાં હું જરા ખૂલું !

વીતેલી ક્ષણની કોઈ વાત લઈ ,
ગીતોનાં ઝૂલણાંએ અહીં ઝૂલું !

.....મલકાતા શબ્દોને પૂછું શું છે,
.....સૌ પોતાના આંસુ પોતે લૂંછે !

ઝાડ પર બેઠેલું પેલું પંખી પણ,
ટહુકામાં કેવો  ઉમળકો  બતાવે !

.....પોતાના જણ અહીં કરવત થૈ ,
.....આપણાં જ ઝાડવાં  ને કપાવે !

વાંસળીની ફૂંક બળબળતી લૂ છે,
સૌ  પોતાના આંસુ  પોતે જ  લૂંછે !
-------------------------------------
-કૃષ્ણકાંત ભાટિયા 'કાન્ત'
--------------------------------------