દોસ્ત  2014 !

દોસ્ત  2014,મારા મનના માણીગર,
હું હવે શબ્દોનો સન્નાટો ઓઢીને....

તારી નવી કંડારેલી કેડી પર,
ચાલવા આવું છું !

શોધવાં છે મારે નવું યૌવન ,
નવી કવિતા...

સોનકણી શી  સૂરોની સરગમ,
નવી સરિતા ,નવી સંહિતા !

મારા ફૂલ ગુલાબી ઘડપણ કેરી,
શોધવા એક એક ક્ષણ આવું  છું !

તવ ચરણ રજ શિરે ચડાવું  છું ,
દીપ આશાઓના પ્રગટાવું   છું !

મને ખબર છે તું મારા માટે ,
નવો  શબ્દકોશ  લઈને  આવ્યો છે.

છંદ અને અલંકારોથી તેં  તારો ,
આવાસ  સજાવ્યો  છે !

2014 ભરી લઈશ આ શબ્દકોશ ,
મારી  ચેતનાના  ગજવામાં !

પછી  લૂંટાવીશ સાંધ્યદીપના ,
ગીતો  રચવામાં!

આ ગીતોને હું મારા મધુર કંઠથી ,
દાદા-દાદી પાર્કમાં આવતાં પંખીઓને ,

સંભળાવીશ ,એમની પાસેથી પણ ,
ગવડાવીશ .........!

મારા આંખોમાં વ્યોમ ભરી લઈશ ,
મારા હૈયામાં પ્રેમ ભરી લઈશ !

છોડીને સપનાં અતીતના વર્તમાનને ,
રોમે રોમ ભરી લઈશ !

2014 ,તારાં એઠાં બોર ખવડાવીશને ?
હું,તને મળવા આવું  છું !
--------------------------------------------
-કૃષ્ણકાંત ભાટિયા 'કાન્ત'
---------------------------------------------