ગીત 

કમખામાં  સખી  મોર   હું  ચીતરું,
     અને  પછી  દોઢી  ગાંઠ   બાંધું  !
હલકારો આવી સાદ પાડે આંગણે ,
     ઝટપટ   હું      લાપસી    રાંધું  !
સંદેશો   જયાં  મારા   કાને  પ્રવેશે,
     સૂર થઈ ને  રૂડાં  શબ્દો   પ્રકટે,
આંખના ઇશારાને સખી એ સમજે,
    મારી  પાંપણના  એક  જ ઝટકે !
જીવતરના  રસ્તે  ભેટમાં  મળેલા,
     ફાટેલાં  ઓરતાં રોજ   હું સાંધું !
સપ્તપદી  માંડતાં  કરી'તી   અમે,
     હોંશે   સાત   વચનોની   વાત !
મૂઈ  હું  ભોળી  ને  ઘાયલ  પ્રેમની,
     ઢોલિયા  પર  વીતી  ગઈ રાત !
વહેલી પરોઢે   મસ્ત મસ્ત ઊંઘમાં,
     મને હીર-રાંઝાનું સપનું  લાધું !
લીંપી-ઘૂંપી ને   ઝૂંપડી છે સજાવી,
     દીવડે  ઝગમગાવી  છે   ભાત !
આવશે   મારા   મનનો  માણીગર,
     પછી   સોનેરી  ઊગશે  પ્રભાત !
મારું   હૈયું    ધબક   ધબક   ધબકે,
     'કાન્ત' મારું સમ છે એણે ખાધું !
                    ***
-'કાન્ત'