ગીત 

એક  સામટાં  સજી  ધજીને  હોળીના રંગો આવ્યા,
શ્વેત   ધવલ પાનેતરમાં  મેં   મોરલાં ચીતરાવ્યાં  !

               ઘરના   ઉંબરિયે   ઉભી 
               હું   હોરી  ગીતો   ગાતી !
               પવન અડે  તો પણ  હું,
               છાનું -છાનું   શરમાતી !
પિચકારીની    છાયા   સાથે  સાજણજી  ત્રોફાવ્યાં ,
શ્વેત  ધવલ   પાનેતરમાં મેં   મોરલાં ચીતરાવ્યાં !
               મારકણી આંખોમાં મારી,
               ઊછળે  તોફાની  સાગર.
               અમથી એમાં મારુ ડૂબકી,
               અને  થઈ  જાઉં પાગલ !
ફાગણમાં  કેસુડો   મ્હોર્યો,  વન-વગડા  લહેરાયાં , 
શ્વેત  ધવલ  પાનેતરમાં  મેં  મોરલાં  ચીતરાવ્યાં !
                રોમેરોમ બન્યું અનુરાગી,
                શરમ  મને છોડીને ભાગી.
                નખશિખ  ભીંજાઈ ગઈ હું,
                લાગણીઓ  મારી  જાગી !
હોળીના  પ્રકાશમાં,  આંગણિયે   ઉજાશ   વાવ્યાં 
શ્વેત  ધવલ પાનેતરમાં, મેં મોરલાં  ચીતરાવ્યાં !
                              ***
-'કાન્ત'