ગીત 

ઊંચકી  ઉમંગ  ઊભું   છે   આયખું,

.....એમાં વેદના  સંવેદના  ના પૂર !

વીંટળાતો જાઉં સગપણની વેલમાં,

.....મારે  હૈયે  વહે  લાગણી ભરપૂર !

ઝરણાનું ગીત, વહે કલકલ  સંગીત,

.....મળી જાય મને મનગમતી પ્રીત !

અર્થના  સગપણને  શોધું  હું   જયારે ,

.....ગૂંજી  ઊઠે  રૂડા  સંબંધોના   મીત !

વરસાદી સાંજે મારું તન-મન ગાંડુંતૂર,

.....મારે   હૈયે  વહે  લાગણી   ભરપૂર !

ઓણ સાલ જોવું હમીરસરનું છલકાવું ,

.......મોટા બંધમાં વરસાદનું મલકાવું !

આંખમાંના  દરિયાને  નીરખું  હું  ત્યારે,

.......ડાબી   આંખનું  ઓચિંતું    ફરકાવું !

કૃષ્ણ  રડે  દ્વારિકામાં  આંસુના ઘોડાપૂર,

.......મારે   હૈયે  વહે   લાગણી   ભરપૂર !

બારણે   ઊભી ને કોઈ   સાંકળ ખખડાવે,

.......હાક દઈ  નામની  મને  ખળભળાવે !

દરવાજા  ખોલવા દોડી જાઉં હું હરખાતો,

.......શ્રદ્ધા, ખોટી  અવઢવને મારી ભગાવે ! 

નથી રહ્યો  'કાન્ત'  આજે પોતાનાથી  દૂર,

.......મારે   હૈયે   વહે   લાગણી     ભરપૂર !

                            ***

-'કાન્ત'