ગઝલ 

શ્વાસમાં   સંચરે  શબ્દમાં  અવતરે ગુજરાત,
નરસિંહ,મીરાંના  પદોમાં  વિસ્તરે  ગુજરાત !

ગરવા  ગીરમાં  ડણક   સંભળાય  સાવજની,
કોક ચારણકન્યાની દોટમાં  પ્રસરે  ગુજરાત !

દાદા મેકરણનું   'જીનામ'  રણને  હોંકારો  દે,
લાલિયા મોતિયાની આંખોમાં  સરે ગુજરાત !

રૂપ  એનું  અલખ,વરતાય જેસલ-તોરલમાં ,
જૈન સાધુઓના ધવલ વસ્ત્રોમાં ફરે ગુજરાત !

રણકાંધીએ દત્તાત્રેય ને હાજીપીરના બેસણા,
સાધુ હો કે મૌલા પગે પડી  કરગરે  ગુજરાત !
                              ***
-'કાન્ત'