પુસ્તક !
આજે પણ હું કોઈ પુસ્તકને સ્પર્શું છું ,
ને છમ્મ લીલું શબ્દવન ઊગી નીકળે છે.
પાના પર ફરતી આંગળીઓમાંથી ,
જાગી ઊઠે છે સરસ્વતીચન્દ્ર !
કુમુદની ચંચળતા દોડાદોડ કરે છે.
પરોઢિયે ઊંઘમાં આવેલાં સપનાં ,
શરદબાબુના વાર્તા નાયકને ઊભો
કરી દે છે મારી સમક્ષ !
પાંચ દાયકા પહેલાનાં તારીખિયાને,
લટકાવું છું ભીંત પર !
દીવા ના પ્રકાશમાં ભાંગતી રાતે વાંચેલા
પુસ્તકો એક પછી એક ભેટવા લાગે છે મને !
કુસુમ,કાક,અમીરઅલી,જગ્ગા,ગાંધી.....
વાતો કરે છે મારી સાથે !
2015 માં પાછો ફરું છું ,
કોમ્પ્યુટરના કીબોર્ડ પર ફરતી ,
મારી આંગળીના ટેરવા હિજરાય છે !
હૃદય આજે પણ પુસ્તકના
ગળચટ્ટા થપથપાટને પડઘાવ્યા કરે છે.
હું ઊભો થાઉં છું.
હર્ષદ ત્રિવેદીની 'કવિતા અને હું'
મળીયે છીએ....એ મને આશ્લેષમાં
લઈ હોઠ પર મીઠું ચુંબન દે છે.....!
અને મારા કાનમાં ગુંજવા લાગે છે,
મધુરાષ્ટક....હા,મારા પુસ્તકના
હોઠ મધુર છે,શરીર મધુર છે.......
એનું આવન-જાવન મધુર છે !
પુસ્તક મારું પંચામૃત છે !
***
-'કાન્ત'
No comments:
Post a Comment