ગીત
તારી આંખોમાં વર્ષા થઈ છલકાઉં,
પર્ણ પર બેઠેલી બૂંદ જેમ હરખાઉં !
ખોબામાં હોઉં તારા, જળ સમેટીને,
બફારો ને ઘામ સઘળુંયે વેઠીને !
દરિયાનું ઘૂઘવતું ગીત હું ગાઉં !
0તારી...
પ્રીત્યું મ્હોરે અષાઢી સાંજે સામટી,
પ્રિયતમ મારો વરણાગી ગામઠી !
બારસાખે તોરણમાં ઢેલ થઈ જાઉં !
0તારી...
પાદરમાં ધ્રુબકે ઢોલ ને,હૈયું નાચે,
રુદિયે પાડેલા અક્ષરો સાહ્યબો વાંચે !
સમણું થઈને એની આંખે સમાઉં !
0તારી...
સખીઓ પજવે ને નણદલ પજવે,
વેશ જાજા તેઓ લાગણીના ભજવે !
અમથો વાય વાયરો ઓરડે ભરાઉં !
0તારી ...
તમરાં બોલે ને અંધાર રૂડો લાગતો,
કાયા ,ને 'કાન્ત' મનડું યે જાગતું !
સભર સભર લહેરાઈ હું રે મલકાઉં !
*** 0તારી...
-'કાન્ત'
No comments:
Post a Comment